ഒറ്റനോട്ടത്തിൽ മാറ്റങ്ങളില്ലാതെ പുത്തൻ കോമ്പസ് മോഡൽ. ജീപ്പിന്റെ ഇന്ത്യയിലെ ഏറ്റവും വില്പനയുള്ള എസ്യുവിയുടെ പരിഷ്കരിച്ച മോഡൽ കഴിഞ്ഞ ദിവസം ആണ് ഫിയറ്റ് ക്രൈസ്ലർ ഓട്ടോമൊബൈൽസ് ആഗോളവിപണിയിൽ അവതരിപ്പിച്ചത്.
എക്സ്റ്റീരിയറിലെ മാറ്റങ്ങളെല്ലാം വളരെ ചെറുതാണ്. പുനർരൂപകല്പന ചെയ്ത 7-സ്ലാട്ട് ഹണി കോംബ് മെഷുള്ള ഗ്രിൽ, റീ-പ്രൊഫൈൽ ചെയ്ത ഹെഡ്ലാംപ് എന്നിവയാണ് 2021 ജീപ്പ് കോമ്പസിൽ ശ്രദ്ധിച്ചാൽ മനസ്സിലാക്കാവുന്ന മാറ്റങ്ങൾ. റീഡിസൈൻ ചെയ്ത വലിപ്പം കൂടിയ അലോയ് വീൽ മാറ്റി നിർത്തിയാൽ വശങ്ങൾക്കും പിൻഭാഗത്തിനും മാറ്റങ്ങൾ ഒന്നും തന്നെയില്ല. വിവിധ വേരിയന്റുകൾക്കായി 16 മുതൽ 19-ഇഞ്ച് വീലുകളിൽ 2021 ജീപ്പ് കോമ്പസ് ലഭ്യമാണ്.
എക്സ്റ്റീരിയറിയിൽ മാറ്റങ്ങൾ നാമം മാത്രമാണെങ്കിലും ഇന്റീരിയറിലെ സ്ഥിതി വ്യത്യസ്തമാണ്. ഇന്റീരിയറിൽ ഉപയോഗിച്ചിരിക്കുന്ന ഘടകങ്ങളുടെ ഗുണനിലവാരം കാര്യമായി മെച്ചപ്പെടുത്തിയിട്ടുണ്ട്. 8.4-ഇഞ്ച് ടച്ച് സ്ക്രീൻ ഇൻഫോടൈന്മെന്റ് സിസ്റ്റം ഇപ്പോൾ ഫിയറ്റ് ക്രൈസ്ലർ ഓട്ടോമൊബൈൽസിന്റെ ഏറ്റവും പുതിയ യുകണക്ട് 5 സോഫ്റ്റ്വെയർ അടിസ്ഥാനമാക്കിയാണ് പ്രവർത്തിക്കുന്നത്. ആപ്പിൾ കാർപ്ലേയ്, ആൻഡ്രോയിഡ് ഓട്ടോ എന്നീ കണക്ടിവിറ്റിയുള്ള ഈ യൂണിറ്റിന് ഇപ്പോൾ ആമസോൺ അലെക്സ കണക്ടിവിറ്റിയുമുണ്ട്. കണക്ടഡ് ടെക്നോളോജിയുടെ കാര്യത്തിൽ എതിരാളികളേക്കാൾ വളരെ മുന്നിലാണ് 2021 ജീപ്പ് കോമ്പസ്.
പുതിയ ജീപ്പ് കോമ്പസിലെ ഏറ്റവും പ്രധാനപ്പെട്ട അപ്ഡേറ്റ് പുത്തൻ എഞ്ചിനുകളാണ്. 128 ബിഎച്ച്പി, 148 ബിഎച്ച്പി എന്നിങ്ങനെ രണ്ട് റ്റ്യൂണിംങിൽ എത്തിയിരിക്കുന്ന 1.3 ലിറ്റർ, നാല് സിലിണ്ടർ, ടർബോ ചാർജ്ഡ് എൻജിനാണ് പ്രധാന. ഇപ്പോൾ ജീപ്പ് കോമ്പസ് ലഭ്യമായ പെട്രോൾ എഞ്ചിനെക്കാൾ ഡിസ്പ്ലേസ്മെന്റ് കുറഞ്ഞ എന്നാൽ കൂടുതൽ കാര്യക്ഷമമായ എൻജിൻ ആണിത്. ആറ് സ്പീഡ് മാനുവൽ, ഏഴ് സ്പീഡ് ഡ്യുവൽ ക്ലച്ച് ഓട്ടോമാറ്റിക് എന്നിവയാണ് ഈ എൻജിനൊപ്പമുള്ള ഗിയർബോക്സ് ഓപ്ഷനുകൾ. കൂടാതെ പുതിയ 1.6 ലിറ്റർ, നാല് സിലിണ്ടർ, മൾട്ടി-ജെറ്റ് ഡീസൽ എഞ്ചിൻ 118 ബിഎച്ച്പി പവറും 320 എൻഎം പീക്ക് ടോർക്ക് ഉത്പാദിപ്പിക്കും. ഈ എഞ്ചിൻ ആറ് സ്പീഡ് മാനുവൽ ട്രാൻസ്മിഷനുമായാണ് ബന്ധിപ്പിച്ചിരിക്കുന്നത്.
അടുത്ത വർഷത്തിന്റെ തുടക്കത്തിൽ ആവും 2021 ജീപ്പ് കോമ്പസ് ഇന്ത്യൻ വിപണിയിലെത്തുക. ഇന്ത്യ-സ്പെക് മോഡലിന്റെ എഞ്ചിന് മാറ്റങ്ങളുണ്ടാവില്ല. 161 ബിഎച്ച്പി പവറും 250 എൻഎം ടോർക്കും ഉത്പാദിപ്പിക്കുന്ന 1.4 ലിറ്റർ പെട്രോൾ എഞ്ചിൻ ആണ് ബിഎസ്6 കോമ്പസ്സിന്. 6 സ്പീഡ് മാനുവൽ അല്ലെങ്കിൽ 7 സ്പീഡ് ഡ്യുവൽ ക്ലച്ച് ഓട്ടോമാറ്റിക് എന്നിവയാണ് പെട്രോൾ എൻജിനൊപ്പമുള്ള ഗിയർബോക്സ് ഓപ്ഷനുകൾ. 170 ബിഎച്ച്പി പവറും 350 എൻഎം പീക്ക് ടോർക്കും ഉത്പാദിപ്പിക്കുന്ന 2.0-ലിറ്റർ ടർബോ-ഡീസൽ എൻജിന് 6 സ്പീഡ് മാനുവൽ അല്ലെങ്കിൽ 9 സ്പീഡ് ഓട്ടോമാറ്റിക് ആണ് ഗിയർബോക്സുകൾ. ഓൾ-വീൽ ഡ്രൈവ് സിസ്റ്റം ഡീസൽ എഞ്ചിനിനോടൊപ്പം മാത്രമേയുള്ളു.
