കോട്ടയം: റെയില്വേ സ്റ്റേഷനില്നിന്ന് അന്തർ സംസ്ഥാന തൊഴിലാളിയെ നാല് കിലോ കഞ്ചാവുമായി പൊലീസ് പിടികൂടി. ഒഡിഷ സ്വദേശി പരേഷ് നായിക്കാണ് (29) പിടിയിലായത്. വെള്ളിയാഴ്ച രാത്രി 8. 30 ഓടെ ഷാലിമാര് എക്സ്പ്രസില് വന്നിറങ്ങിയ പരേഷിൻെറ ബാഗില്നിന്ന് പൊലീസ് നായ് ഡോണ് മണംപിടിച്ച് കഞ്ചാവ് കണ്ടെത്തുകയായിരുന്നു.
പാലാ വലവൂരിലുള്ള സ്വകാര്യ ഫാക്ടറിയില് ജോലിക്ക് എത്തിയതായിരുന്നു പരേഷ്. ട്രെയിനില് കോട്ടയത്ത് ഇറങ്ങി പാലായിലേക്ക് ബസിൽ പോകാനുള്ള തയാറെടുപ്പിലായിരുന്നു. ഇതിനിടയിലാണ് പൊലീസ് നായ് ഡോണ് പരേഷിൻെറ ബാഗില് മണംപിടിച്ചത്.
കോട്ടയം ഡിവൈ.എസ്.പി ജെ. സന്തോഷ്കുമാറിൻെറ നിര്ദേശാനുസരണം ഈസ്റ്റ് എസ്.എച്ച്.ഒ യു. ശ്രീജിത്ത്, എസ്.ഐ എം.എച്ച്. അനുരാജ്, ലഹരിവിരുദ്ധ സ്ക്വാഡ് അംഗങ്ങളായ സജീവ് ചെറിയാന്, ബിജോയ് മാത്യു, തോംസണ് കെ. മാത്യു, അജയകുമാര്, ശ്രീജിത്ത് വി. നായര്, എസ്. അരുണ്, ഷെമീര് സമദ്, ഡോഗ് സ്ക്വാഡ് അംഗങ്ങളായ പ്രേംജി, പ്രമോദ് തമ്പി, ബിനോയി എന്നിവര് ചേര്ന്നാണ് പ്രതിയെ പിടികൂടിയത്.
