കേന്ദ്ര സര്ക്കാരിന്റെ നിരോധനത്തിന് പിന്നാലെ പോപ്പുലര് ഫ്രണ്ട് സംഘടന പിരിച്ചുവിട്ടതായി സംസ്ഥാന ജനറല് സെക്രട്ടറി എ.അബ്ദുള് സത്താര് അറിയിച്ചു. പോപ്പുലര് ഫ്രണ്ടിന്റെ ഫെയ്സ്ബുക്ക് പേജിലൂടെയാണ് അബ്ദുള് സത്താര് ഇക്കാര്യം അറിയിച്ചത്.
‘പോപ്പുലര് ഫ്രണ്ട് ഓഫ് ഇന്ത്യ പിരിച്ചുവിട്ടതായി അതിന്റെ എല്ലാ മുന് അംഗങ്ങളെയും പൊതുജനങ്ങളെയും അറിയിക്കുന്നു. നിയമവിരുദ്ധമെന്ന വിജ്ഞാപനം പ്രസിദ്ധീകരിച്ചത് മുതല് പോപ്പുലര് ഫ്രണ്ട് ഓഫ് ഇന്ത്യയുടെ പ്രവര്ത്തനങ്ങള് നിര്ത്താന് എല്ലാ മുന് അംഗങ്ങളോടും അഭ്യര്ഥിക്കുന്നു’ എന്നാണ് പ്രസ്താവനയില് പറയുന്നത്.
തീവ്രവാദ ഫണ്ടിങുമായി ബന്ധമുണ്ടെന്നും, രാജ്യസുരക്ഷക്കും ക്രമസമാധാനത്തിനും ഭീഷണിയാണെന്നും ചൂണ്ടിക്കാണിച്ചാണ് പോപ്പുലര് ഫ്രണ്ട് ഓഫ് ഇന്ത്യയെ ആഭ്യന്തര മന്ത്രാലയം നിരോധിച്ചത്.
ഇതിനിടെ കേന്ദ്ര ഏജന്സികളുടെ റെയ്ഡിനെ തുടര്ന്ന് ഹര്ത്താലിന് ആഹ്വാനം ചെയ്ത് ഒളിവില് പോയ അബ്ദുള് സത്താറിനെ പോലീസ് അറസ്റ്റ് ചെയ്തിരുന്നു.
