തൃശൂര്: ലോക്ഡൗണിന്റെ ഇളവുകളോടെയുള്ള അഞ്ചാം ഘട്ടത്തില് ഗുരുവായൂര് ക്ഷേത്രത്തില് വിവാഹങ്ങള് നടത്താന് അനുമതിയായി. ജൂണ് നാല് മുതല് വിവാഹങ്ങള് നടത്താന് ദേവസ്വം ബോര്ഡ് തീരുമാനിച്ചു. സര്ക്കാര് അനുമതി ലഭിച്ചതിനെ തുടര്ന്നാണ് ഇത്. ജില്ലാ കളക്ടറേറ്റില് ചേര്ന്ന യോഗത്തില് വിവാഹങ്ങള് നടത്തുന്നതിനുളള സമയക്രമവും നടപടികളും തീരുമാനിച്ചു.
പരമാവധി 60 വിവാഹങ്ങള് ഒരു ദിവസം നടത്താം. പുലര്ച്ചെ അഞ്ചു മുതല് ഉച്ചയ്ക്ക് 12 വരെ 10 മിനിറ്റ് വീതം സമയം നല്കിയാണ് വിവാഹത്തിന് അനുമതി നല്കുന്നത്. വിവാഹം നടത്തുന്നതിനുള്ള അഡ്വാന്സ് ബുക്കിംഗ് ഉടനെ ആരംഭിക്കും.
വിവാഹത്തില് പങ്കെടുക്കുന്നവരുടെ ഫോട്ടോ പതിച്ച തിരിച്ചറിയല് കാര്ഡും അതാത് മെഡിക്കല് ഓഫീസറില്നിന്നു ലഭിച്ച നോണ് ക്വാറന്റെയ്ന്, നോണ് ഹിസ്റ്ററി സര്ട്ടിഫിക്കറ്റുകള് വിവാഹം ബുക്ക് ചെയ്യുന്ന സമയം ഹാജരാക്കണം.
വധു വരന്മാര് കൂടെ കൊണ്ടുവരുന്ന ഫോട്ടോഗ്രാഫര്മാരെ അനുവദിക്കുന്നതല്ല. ദേവസ്വം ഫോട്ടോഗ്രാഫര്മാരെ ഏര്പ്പെടുത്തുന്നതാണ്. വിവാഹം ബുക്ക് ചെയ്യുന്നതിന് കിഴക്കേനട ബുക്സ് സ്റ്റാളില് രാവിലെ 10 മുതല് വൈകിട്ട് ഏഴു വരെ ബുക്കിംഗ് കൗണ്ടര് ആരംഭിക്കുമെന്നും ഗുരുവായൂര് ദേവസ്വം ചെയര്മാന് അറിയിച്ചു.
