മുംബൈ: നടി റിയ ചക്രവർത്തിയെ നാർക്കോട്ടിക് കൺട്രോൾ ബ്യൂറോ (എൻസിബി) അറസ്റ്റ് ചെയ്തു. ബോളിവുഡ് നടൻ സുശാന്ത് സിംഗ് രജ്പുത് ജീവനൊടുക്കിയ കേസുമായി ബന്ധപ്പെട്ട മയക്കുമരുന്നു കേസിലാണ് നടിയുടെ അറസ്റ്റ്. മൂന്നു ദിവസത്തെ ചോദ്യം ചെയ്യലിനു ശേഷമാണ് അറസ്റ്റ് രേഖപ്പെടുത്തിയത്. ശക്തമായ തെളിവുകളുടെ അടിസ്ഥാനത്തിലാണ് അറസ്റ്റെന്ന് എൻസിബി അറിയിച്ചു.
സുശാന്തിന്റെ ആവശ്യ പ്രകാരം ലഹരിമരുന്ന് എത്തിച്ച് നൽകിയതായി നാർക്കോട്ടിക്സ് കൺട്രോൾ ബ്യൂറോ (എൻസിബി) ചോദ്യം ചെയ്യുന്നതിനിടെ റിയ വെളിപ്പെടുത്തിയിരുന്നു. റിയ ചക്രവർത്തിയുടെ സഹോദരൻ ഷോവിക് ചക്രവർത്തിയെയും സുശാന്തിൻറെ മുൻ മാനേജർ സാമുവൽ മിരാൻഡയെയും നാർക്കോട്ടിക്സ് കൺട്രോൾ ബ്യൂറോ നേരത്തേ അറസ്റ്റ് ചെയ്തിരുന്നു. ഇതോടെ ഈ കേസിൽ അറസ്റ്റിലായവരുടെ എണ്ണം ഒന്പതായി.
