പ്ലസ് ടു വിജയിക്കുന്നവര്ക്ക് ലേണേഴ്സ് ലൈസന്സ് നല്കാനുള്ള പദ്ധതിയുമായി ഗതാഗത വകുപ്പ്. ഹയര് സെക്കന്ഡറി പാഠ്യ പദ്ധതിയില് ലേണേഴ്സ് ലൈസന്സിനുള്ള പാഠഭാഗങ്ങള് കൂടി ഉള്പ്പെടുത്താനാണ് ശുപാര്ശ.
അടുത്ത ആഴ്ച മോട്ടോര് വാഹനവകുപ്പ് ഇതിനായി തയാറാക്കിയ കരിക്കുലം വിദ്യാഭ്യാസവകുപ്പിന് കൈമാറും. സര്ക്കാര് അംഗീകാരം നല്കിയാല് നിയമത്തില് ഭേദഗതി വരുത്താന് കേന്ദ്രത്തെ സമീപിക്കാനാണ് തീരുമാനം.
പ്ലസ്ടു ജയിക്കുന്നവര്ക്ക് വിദ്യാഭ്യാസ സര്ട്ടിഫിക്കറ്റിനൊപ്പം ലേണേഴ്സ് സര്ട്ടിഫിക്കറ്റും നല്കാനാണ് പദ്ധതിയിടുന്നത്.ഇതിനായി റോഡ് നിയമവും ഗതാഗത നിയമവും ഉള്പ്പെടെ ലേണേഴ്സ് സര്ട്ടിഫിക്കറ്റിന് ആവശ്യമായ കാര്യങ്ങളെല്ലാം പ്ലസ് വണ്, പ്ലസ് ടു ക്ലാസുകളില് പഠിപ്പിക്കും.
സര്ക്കാരിന്റെ അംഗീകാരം ലഭിച്ചാല് കേന്ദ്ര വാഹന ഗതാഗത നിയമത്തിലടക്കം മാറ്റം വരുത്തണം. അതിനായി കേന്ദ്ര സര്ക്കാരിനെ സമീപിക്കാനാണ് ഗതാഗത വകുപ്പിന്റെ തീരുമാനം.
പദ്ധതി നടപ്പാക്കുന്നതിലൂടെ പ്രധാനമായും രണ്ടു നേട്ടങ്ങളാണ് വകുപ്പ് കാണുന്നത്. ഒന്ന്, ലേണേഴ്സ് സര്ട്ടിഫിക്കറ്റ് നേടുന്നതില് നിലവിലുള്ള ക്രമക്കേടുകള് അവസാനിപ്പിക്കാം. മറ്റൊന്ന്, റോഡ് നിയമങ്ങളേക്കുറിച്ച് വിദ്യാര്ത്ഥികള് തന്നെ ബോധവാന്മാരാവുകയും ചെയ്യും.
