കോട്ടയം: പിടിച്ചെടുത്ത ബസ് തിരിച്ച് നൽകണമെന്ന് ആവശ്യപ്പെട്ട് റോബിൻ ബസിന്റെ ഉടമ ഇന്ന് ഗാന്ധിപുരം ആർടിഒ ഓഫീസിൽ കത്ത് നൽകും. ഇന്നലെ ഓഫീസ് അവധിയായതിനാൽ മോട്ടോർ വെഹിക്കിൾ ഡയറക്ടർ എത്തിയ ശേഷം തുടർ നടപടികൾ സ്വീകരിക്കുമെന്ന് തമിഴ്നാട് ആർടിഒ അറിയിച്ചിരുന്നു. ബസിലെ യാത്രക്കാരെ ഇന്നലെ രാത്രിയോടെ തന്നെ നാട്ടിലേക്ക് എത്തിച്ചിരുന്നു.
വാളയാർ അതിർത്തി വരെ തമിഴ്നാട് ആർടിസി ബസിലും പിന്നീട് ബസുടമ ഏർപ്പാട് ചെയ്ത വാഹനത്തിലുമാണ് ഇവരെ നാട്ടിലേക്ക് എത്തിച്ചത്. 22ന് ബസിന്റെ പെർമിറ്റ് സംബന്ധിച്ച വിധി വരാനിരിക്കെ കേരള സർക്കാരിന്റെ ഒത്താശയോടെ നടത്തുന്ന നാടകമാണിതെന്നാണ് ബസുടമ ആരോപിക്കുന്നത്.
രണ്ടാം ദിനം സർവീസ് നടത്തിയ റോബിൻ ബസ് തമിഴ്നാട് മോട്ടോർ വാഹന വകുപ്പ് പെർമിറ്റ് ലംഘനം ചൂണ്ടിക്കാട്ടി പിടിച്ചെടുക്കുകയായിരുന്നു. തുടർന്ന് മോട്ടോർ വാഹനവകുപ്പിന്റെ ഗാന്ധിപുരം സെൻട്രൽ ഓഫീസിലേക്ക് ബസ് മാറ്റി.
