സംസ്ഥാനത്ത് സർക്കാർ സ്കൂളുകളിലെ ഒന്നു മുതൽ 8 വരെയുള്ള ക്ലാസിലെ വിദ്യാർത്ഥികൾക്ക് സൗജന്യമായി യൂണിഫോം വിതരണം ചെയ്യുന്നു. പരിപാടി യുടെ സംസ്ഥാനതല ഉദ്ഘാടനം ഇന്ന് നടക്കും. തിരുവനന്തപുരത്ത് നടക്കുന്ന പരിപാടി മന്ത്രി പി രാജീവ് ഉദ്ഘാടനം ചെയ്യും. കഴക്കൂട്ടം ഗവൺമെന്റ് ഹയർ സെക്കൻഡറി സ്കൂളിലാണ് മന്ത്രി പി രാജീവ് കൈത്തറി യൂണിഫോമിന്റെ വിതരണ പരിപാടി ഉദ്ഘാടനം നിർവഹിക്കുക. പരിപാടിയിൽ മന്ത്രി വി ശിവൻകുട്ടി അധ്യക്ഷനാകും.
സംസ്ഥാനത്തെ 13 ലക്ഷത്തിലധികം വിദ്യാർത്ഥികൾക്ക് ഈ ആനുകൂല്യം ലഭ്യമാകും. ഈ പദ്ധതിക്ക് 79 കോടി രൂപയിൽ അധികം തുക സർക്കാർ അനുവദിച്ചിട്ടുണ്ട്. എപിഎൽ ബിപിഎൽ വ്യത്യാസമില്ലാതെ മുഴുവൻ കുട്ടികൾക്കും യൂണിഫോം ലഭിക്കുന്ന വിധത്തിലാണ് പദ്ധതി ക്രമീകരിച്ചിരിക്കുന്നത്.
നിലവില് സൗജന്യ യൂണിഫോം പദ്ധതി രണ്ട് ഘടകങ്ങളായാണ് നടപ്പിലാക്കുന്നത്. പൊതുവിദ്യാഭ്യാസ ഡയറക്ടറേറ്റിന് കീഴിൽ വരുന്ന സൗജന്യ യൂണിഫോം പദ്ധതിയും സൗജന്യ കൈത്തറി യൂണിഫോം പദ്ധതിയും.
കൈത്തറി യൂണിഫോം ലഭിക്കാത്ത 1 മുതൽ 8 വരെയുള്ള ഗവണ്മെന്റ് ഹൈസ്കൂളിലെ എപിഎല് വിഭാഗം ആണ്കുട്ടികള്ക്കും, 1 മുതൽ 8 വരെയുള്ള എയ്ഡഡ് സ്കൂളുകളിലെ മുഴുവൻ കുട്ടികള്ക്കും ഇതോടൊപ്പം 1 മുതൽ 5 വരെയുള്ള എയ്ഡഡ് എൽ പി സ്കൂളിലെ മുഴുവന് കുട്ടികള്ക്കും ഒരു കുട്ടിക്ക് രണ്ട് ജോഡി യൂണിഫോമിന് 600 രൂപ നിരക്കിൽ അലവന്സ് പൊതുവിദ്യാഭ്യാസ വകുപ്പിൽ നിന്നും നല്കി വരുന്നുണ്ട്.
