ഇലഞ്ഞി: നഗരവൽക്കരണവും സ്ഥലപരിമിതിയും വർധിക്കുന്ന സാഹചര്യത്തിൽ വീടുകളിലും ഫ്ലാറ്റുകളിലും എളുപ്പത്തിൽ പച്ചക്കറികൾ കൃഷി ചെയ്യാൻ കഴിയുന്ന 'എയറോപോണിക് ടവർ ഫാമിംഗ് സിസ്റ്റം' വികസിപ്പിച്ച് വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ശ്രദ്ധേയമാകുന്നു. വിസാറ്റിന്റെ ഇലക്ട്രോണിക്സ് ആൻഡ് കമ്മ്യൂണിക്കേഷൻ എൻജിനീയറിംഗ് (ഇ.സി.ഇ.) വിഭാഗത്തിന്റെ നേതൃത്വത്തിലാണ് ഈ നൂതന കൃഷി സംവിധാനം വികസിപ്പിച്ചിരിക്കുന്നത്.
ഏകദേശം ആറടി ഉയരവും ആറിഞ്ച് വ്യാസവുമുള്ള ലംബാകൃതിയിലുള്ള ടവറാണ് ഈ സംവിധാനത്തിന്റെ പ്രധാന ഘടകം. മണ്ണില്ലാതെ സസ്യങ്ങളുടെ വേരുകൾ വായുവിൽ തൂക്കിയിട്ട നിലയിൽ വളരുകയും, പോഷകസമൃദ്ധമായ ജലമിശ്രിതം നേർത്ത മഞ്ഞുരൂപത്തിൽ (Mist) വേരുകളിലേക്ക് സ്പ്രേ ചെയ്യുകയും ചെയ്യുന്ന സാങ്കേതികവിദ്യയാണ് എയറോപോണിക്സ്. ഇതിലൂടെ സസ്യങ്ങൾക്ക് ആവശ്യമായ പോഷകങ്ങൾ കൂടുതൽ കാര്യക്ഷമമായി ലഭിക്കുകയും വളർച്ച വേഗത്തിലാകുകയും ചെയ്യുന്നു.
വീടുകളുടെ വരാന്തകൾ, ബാൽക്കണികൾ, ടെറസുകൾ, അപ്പാർട്ട്മെന്റുകൾ എന്നിവിടങ്ങളിൽ വളരെ കുറച്ച് സ്ഥലം മാത്രം ഉപയോഗിച്ച് ഈ സംവിധാനം സ്ഥാപിക്കാൻ കഴിയും. നഗരപ്രദേശങ്ങളിലെ കുടുംബങ്ങൾക്ക് സ്വന്തം ആവശ്യത്തിനുള്ള വിഷരഹിതവും പുതുമയുള്ളതുമായ പച്ചക്കറികൾ ഉത്പാദിപ്പിക്കാൻ ഇത് സഹായകമാകും.
ഭാവിയിലെ ഭക്ഷ്യസുരക്ഷയും സുസ്ഥിര കൃഷിയും മുൻനിർത്തി എൻജിനീയറിങ് സാങ്കേതികവിദ്യകളെ കൃഷിയുമായി സംയോജിപ്പിക്കുന്ന ശ്രമമാണ് ഈ പദ്ധതി. വിദ്യാർത്ഥികളുടെ നൂതന ആശയങ്ങൾ സമൂഹത്തിന് പ്രയോജനപ്പെടുന്ന ഉൽപ്പന്നങ്ങളാക്കി മാറ്റുക എന്ന ലക്ഷ്യവും ഇതിനുണ്ടെന്ന് പദ്ധതിയെക്കുറിച്ച് വിശദീകരിച്ച വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസിന്റെ ഡയറക്ടർ ഡോ. സന്തോഷ് സൈമൺ പറഞ്ഞു.
ഇത് ഒരു അക്കാദമിക് പ്രോജക്ട് മാത്രമല്ല, വിദ്യാർത്ഥികൾക്ക് സംരംഭകത്വത്തിലേക്കുള്ള ഒരു വാതിൽ കൂടിയാണ്. ഈ എയറോപോണിക് ടവർ സംവിധാനം വിദ്യാർത്ഥികളുടെ നേതൃത്വത്തിലുള്ള ഒരു സ്റ്റാർട്ടപ്പ് സംരംഭമായി വികസിപ്പിക്കാനാണ് പദ്ധതി എന്ന് ഇ.സി.ഇ. വിഭാഗം മേധാവി ഡോ. നിമ്മി ജോൺ പറഞ്ഞു.
പരമ്പരാഗത കൃഷിയുമായി താരതമ്യം ചെയ്യുമ്പോൾ എയറോപോണിക് കൃഷിക്ക് നിരവധി ഗുണങ്ങളുണ്ട്. 90 ശതമാനം വരെ ജലലാഭം സാധ്യമാകുക, മണ്ണിന്റെ ആവശ്യമില്ലാതിരിക്കുക, കീടബാധ കുറയുക, വർഷം മുഴുവൻ കൃഷി നടത്താൻ സാധിക്കുക തുടങ്ങിയവയാണ് പ്രധാന നേട്ടങ്ങൾ. കൂടാതെ ലംബകൃഷി (Vertical Farming) രീതിയായതിനാൽ വളരെ ചെറിയ സ്ഥലത്ത് കൂടുതൽ സസ്യങ്ങൾ വളർത്താനും കഴിയും.
ബാൽക്കണി ഫാമിംഗും ഇൻഡോർ ഫാമിംഗും പ്രോത്സാഹിപ്പിക്കുന്ന ഈ സംവിധാനം കുടുംബങ്ങൾക്ക് ആരോഗ്യകരമായ ഭക്ഷ്യശീലങ്ങൾ വളർത്തുന്നതിനും പച്ചക്കറികളുടെ വിപണിവില വർധനയിൽ നിന്നും രക്ഷനേടാനും സഹായകമാകും. വീടുകളിൽ തന്നെ കൃഷി ചെയ്യുന്നത് കാർബൺ പുറന്തള്ളൽ കുറയ്ക്കുകയും പരിസ്ഥിതി സംരക്ഷണത്തിനും പിന്തുണ നൽകുകയും ചെയ്യും.
പദ്ധതിയുടെ അടുത്തഘട്ടത്തിൽ ആർട്ടിഫിഷ്യൽ ഇന്റലിജൻസ് (AI), ഇന്റർനെറ്റ് ഓഫ് തിങ്സ് (IoT) സാങ്കേതികവിദ്യകൾ ഉൾപ്പെടുത്താനും വിസാറ്റ് പദ്ധതിയിടുന്നുണ്ട്. സസ്യങ്ങളുടെ ആരോഗ്യം നിരീക്ഷിക്കൽ, രോഗലക്ഷണങ്ങൾ കണ്ടെത്തൽ, പോഷകനിയന്ത്രണം, വിളവെടുപ്പ് പ്രവചനം, ഉൽപാദന വർധന എന്നിവയ്ക്കായി എ.ഐ. അധിഷ്ഠിത സംവിധാനങ്ങൾ വികസിപ്പിക്കും.
നൂതന സാങ്കേതികവിദ്യ, സുസ്ഥിര കൃഷി, വിദ്യാർത്ഥി സംരംഭകത്വം എന്നിവയുടെ സമന്വയത്തിലൂടെ ഭാവിയിലെ സ്മാർട്ട് കൃഷി സംവിധാനങ്ങൾക്ക് മാതൃകയാകുന്ന പദ്ധതിയായി വിസാറ്റിന്റെ എയറോപോണിക് ടവർ ഫാമിംഗ് സംവിധാനം മാറുമെന്ന് പ്രതീക്ഷിക്കുന്നു.
