തിരുവനന്തപുരം: സംസ്ഥാനത്ത് 24പേര്ക്ക് കൂടി കോവിഡ് ബാധ സ്ഥിരീകരിച്ചതായി മുഖ്യമന്ത്രി പിണറായി വിജയന് അറിയിച്ചു. കണ്ണൂര് 3, മലപ്പുറം 4, പാലക്കാട് 7, തിരുവനന്തപുരം, പത്തനംതിട്ട, തൃശൂര് എന്നിവിടങ്ങളില് 2 പേര്ക്കും കാസര്കോഡ്, കോഴിക്കോട്, ആലപ്പുഴ, എറണാകുളം എന്നിവിടങ്ങളില് ഓരോ പേര്ക്കുമാണ് കോവിഡ് സ്ഥിരീകരിച്ചത്.
ഇതില് 12 പേര് വിദേശത്ത് നിന്ന് എത്തിയവരാണ്. മഹാരാഷ്ട്രയില്നിന്ന് വന്ന എട്ടുപേര്ക്കും തമിഴ്നാട്ടില്നിന്ന് വന്ന മൂന്നുപേര്ക്കും രോഗം സ്ഥിരീകരിച്ചു. കണ്ണൂരില് ഒരാള്ക്ക് സമ്പര്ക്കം വഴിയാണ് രോഗം ബാധിച്ചത്. ഇന്ന് അഞ്ച് പേര് രോഗമുക്തരായി. തൃശ്ശൂരില് രണ്ടുപേര്ക്കും കണ്ണൂര്,വയനാട്, കാസര്കോട് എന്നിവിടങ്ങളില് ഓരോരുത്തര്ക്കുമാണ് പരിശോധനാഫലം നെഗറ്റീവായത്.
ഇതുവരെ 666 പേര്ക്കാണ് രോഗം സ്ഥിരീകരിച്ചത്. അതില് 161 പേര് നിലവില് ചികിത്സയിലാണ്. 74,398 പേരാണ് നിരീക്ഷണത്തിലുള്ളത്. ഇതില് 73,865 പേര് വീടുകളിലും 533 പേര് ആശുപത്രികളിലുമാണ് നിരീക്ഷണത്തിലുള്ളത്. ഇന്ന് 156 പേരെ ആശുപത്രിയില് പ്രവേശിപ്പിച്ചിട്ടുണ്ട്.
ഇതുവരെ 48,543 സാമ്പിളുകള് പരിശോധനയ്ക്ക് അയച്ചിട്ടുണ്ട്. 46,961 എണ്ണം രോഗബാധയില്ലെന്ന് ഉറപ്പാക്കി. സെന്റിനല് സര്വൈലന്സിന്റെ ഭാഗമായി മുന്ഗണനാ വിഭാഗത്തില്പ്പെട്ട 6,090 സാമ്പിളുകള് ശേഖരിച്ചതില് 5,728 എണ്ണം നെഗറ്റീവായിട്ടുണ്ട്. സംസ്ഥാനത്ത് പുതിയ ഹോട്ട്സ്പോട്ടുകളില്ലെന്നും മുഖ്യമന്ത്രി പറഞ്ഞു.
നാം കൂടുതല് ഗുരുതരമായ സ്ഥിതിയിലേക്ക് പോവുകയാണെന്ന് ഇന്നലെ തന്നെ സൂചിപ്പിച്ചിരുന്നു. ലോക്ക്ഡൗണില് ചില ഇളവുകള് വരുത്തി. പക്ഷെ തുടര്ന്നുള്ള നാളുകളില് ചില പ്രത്യേക മേഖലകളില് കടുത്ത നിയന്ത്രണം വേണ്ടതായി വരുമെന്നും മുഖ്യമന്ത്രി കൂട്ടിച്ചേര്ത്തു.
