തിരുവനന്തപുരം: സംസ്ഥാനത്തിലെ വിവിധ ജില്ലകളില് അടുത്ത മൂന്ന് മണിക്കൂറിനിടെ ഇടിമിന്നലോട് കൂടിയ മഴയ്ക്കും കാറ്റിനും സാധ്യത. തിരുവനന്തപുരം, കൊല്ലം, ആലപ്പുഴ, പത്തനംതിട്ട, കോട്ടയം, എറണാകുളം, തൃശ്ശൂര് എന്നീ ജില്ലകളിലാണ് ഇടിമിന്നലോട് കൂടിയ മഴയ്ക്കും മണിക്കൂറില് 40 കിലോമീറ്റര് വരെ വേഗതയില് വീശിയടിക്കാവുന്ന കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. മത്സ്യത്തൊഴിലാളികള് കടലില് പോകരുതെന്ന മുന്നറിയിപ്പുമുണ്ട്.
അതേസമയം, തിരുവനന്തപുരത്ത് ഒറ്റപ്പെട്ട സ്ഥലങ്ങളില് കനത്ത മഴ തുടരുകയാണ്. നഗരത്തില് പലയിടത്തും വെള്ളക്കെട്ട് അനുഭവപ്പെട്ടു. നഗരത്തില് അജന്ത തീയറ്റര് റോഡ് വെള്ളത്തിനടിയിലായി. കോട്ടൂര്, കുറ്റിച്ചല് എന്നീ ഭാഗങ്ങളില് വെള്ളക്കെട്ട് അനുഭവപ്പെട്ടു. വൃഷ്ടി പ്രദേശത്ത് കനത്ത മഴ തുടരുന്നതിനാല് അരുവിക്കര ഡാമിന്റെ അഞ്ച് ഷട്ടറുകള് തുറന്നു. നാല് ഷട്ടറുകള് 1.25 മീറ്റര് വീതവും അഞ്ചാമത്തെ ഷട്ടര് ഒരു മീറ്ററുമാണ് തുറന്നത്. ഷട്ടര് തുറന്നത് മൂലം കരമനയാറ്റില് ജലനിരപ്പ് ഉയരുന്നതിനാല് ആറിന്റെ ഇരുകരകളിലും താമസിക്കുന്നവര് ജാഗ്രത പുലര്ത്തണമെന്ന് വാട്ടര് അതോറിറ്റി അറിയിച്ചു.
മഴക്കാല മുന്നൊരുക്കത്തിന്റെ ഭാഗമായി കാരാപ്പുഴ ഡാമിലെ ഷട്ടറുകള് നാളെ തുറക്കുമെന്ന് അധികൃതര് അറിയിച്ചു. മൂന്ന് ഷട്ടറുകള് അഞ്ച് സെന്റീമീറ്റര് വീതം നാളെ രാവിലെ 11 മണി മുതല് തുറന്ന് വിടുന്നതാണ് തീരുമാനിച്ചിരിക്കുന്നത്. വെള്ളം ഒഴുകി പോകുന്ന പുഴയ്ക്ക് സമീപത്തുള്ളവര് ജാഗ്രത പാലിക്കണമെന്ന് കാരാപ്പുഴ എക്സിക്യൂട്ടീവ് എന്ജിനീയര് അറിയിച്ചു.
