കൊറോണ വൈറസ് വ്യാപനത്തിന്റെ പശ്ചാത്തലത്തിൽ രാജ്യത്താകമാനം ലോക്ക്ഡൗൺ പ്രഖ്യാപിച്ചതിന് ശേഷം ഇന്ത്യൻ വിപണി ചെറുതായി സട കുടഞ്ഞെഴുന്നേൽക്കാൻ തുടങ്ങുന്നു. ലോക്ക്ഡൗണിലെ നഷ്ടങ്ങൾ പരിഹരിക്കാൻ വൻ ഓഫറുകളുമായാണ് വാഹന നിർമ്മാതാക്കൾ രംഗത്ത് എത്തിയിരിക്കുന്നത്. കൂട്ടത്തിൽ മാരുതി സുസുക്കിയും തങ്ങളുടെ മിനി എസ്യുവി മോഡൽ ആയ എസ്-പ്രെസോയ്ക്ക് വമ്പൻ ആനുകൂല്യങ്ങളാണ് പ്രഖ്യാപിച്ചിരിക്കുന്നത്.
48,000 രൂപവരെ ഡിസ്കൗണ്ടിൽ ഇപ്പോൾ എസ്-പ്രെസോ സ്വന്തമാക്കാം. 20,000 രൂപയുടെ ക്യാഷ് ഡിസ്കൗണ്ട്, 20,000 രൂപയുടെ എക്സ്ചേഞ്ച് ബോണസ്, 8,000 രൂപയുടെ അക്സെസ്സറികൾ, കോർപ്പറേറ്റ് ഡിസ്കൗണ്ട് എന്നിങ്ങനെ എല്ലാം ചേർന്ന് ഇപ്പോൾ അര ലക്ഷം രൂപവരെ ഡിസ്കൗണ്ടിൽ എസ്-പ്രെസോ വീട്ടിലെത്തും. കഴിഞ്ഞ വർഷം സെപ്റ്റംബറിൽ വില്പനക്കെത്തിയ എസ്-പ്രെസോയ്ക്ക് 3.69 ലക്ഷം മുതൽ 4.91 ലക്ഷം വരെയാണ് എക്സ്-ഷോറൂം വില.
മിനി എസ്യുവി എന്ന അധികം വാഹന നിർമാതാക്കൾ കടന്നു ചെല്ലാത്ത വാഹന സെഗ്മെന്റിലേക്കാണ് എസ്പ്രെസോയുടെ വരവ്. 2018-ൽ ഡൽഹിയിൽ നടന്ന ഓട്ടോ എക്സ്പോയിൽ മാരുതി സുസുക്കിയുടെ സ്റ്റാളിലെ പ്രധാന ആകർഷണമായിരുന്ന ഫ്യുച്ചർ എസ് കൺസെപ്റ്റിൻ്റെ പ്രൊഡക്ഷൻ വേർഷനാണ് എസ്-പ്രെസോ. BS6 മലിനീകരണ നിയന്ത്രണ മാനദണ്ഡങ്ങൾക്കനുസരിച്ചു പരിഷ്കരിച്ച 1.0-ലിറ്റർ, 3-സിലിണ്ടർ K10B പെട്രോൾ എൻജിനാണ് എസ്-പ്രെസോക്ക്. 68 എച്ച്പി പവറും, 90 എൻഎം ടോർക്കും നിർമിക്കുന്ന ഈ എൻജിൻ 5-സ്പീഡ് മാന്വൽ അല്ലെങ്കിൽ എഎംടി ഗിയർബോക്സുകളിലാണ് വില്പനക്കെത്തിയിരിക്കുന്നത്. ഡീസൽ എൻജിനിൽ എസ്-പ്രെസോ ലഭ്യമല്ല.
സ്റ്റാൻഡേർഡ്, LXI, VXI, VXI+ എന്നിങ്ങനെ നാല് പ്രധാന വേരിയൻ്റുകളാണ് എസ്പ്രെസോയ്ക്ക്. ഗിയർബോക്സുകളും, ട്രിം ലെവലുകളും അങ്ങോട്ടും ഇങ്ങോട്ടും ചേരുംപടി ചേർത്താൽ ആകെ 10 വേരിയൻ്റ് ഓപ്ഷനുകളിൽ (സ്റ്റാൻഡേർഡ്, സ്റ്റാൻഡേർഡ് (O), LXI, LXI (O), VXI, VXI (O), VXI+, VXI AGS, VXI (O) AGS, VXI+ AGS) എസ്പ്രെസോ ലഭ്യമാണ്. സോളിഡ് ഫയർ റെഡ്, പേൾ സ്റ്റാറി ബ്ലൂ, സോളിഡ് സിസിൽ ഓറഞ്ച്, മെറ്റാലിക് ഗ്രാനൈറ്റ് ഗ്രേ, മെറ്റാലിക് സിൽകി സിൽവർ, സുപ്പീരിയർ വൈറ്റ്, എന്നിങ്ങനെ 6 നിറങ്ങളിൽ എസ്പ്രെസോ ലഭിക്കും.
എല്ലാ മാസവും ശരാശരി 10,000 യൂണിറ്റ് എസ്-പ്രെസോകളെ മാരുതി സുസുക്കി വിറ്റിരുന്ന സമയത്താണ് കൊറോണ വൈറസ് ബാധ വില്ലനായെത്തിയത്. ഇത് കൂടാതെ ലാറ്റിൻ അമേരിക്ക, ആഫ്രിക്കൻ, ഏഷ്യൻ വിപണികളിലേക്ക് എസ്-പ്രെസോ കയറ്റി അയക്കാനും മാരുതി സുസുക്കി ആരംഭിച്ചിരുന്നു.
