ന്യൂഡൽഹി: സ്വർണക്കടത്ത് കേസുമായ് ബന്ധപ്പെട്ട അന്വേഷണം യു.എ.ഇ യിലേക്കും. യു.എ.ഇ യിലേക്ക് വിമാന സർവീസ് തുടങ്ങിയ സാഹചര്യത്തിലാണ് ഇത്. യാത്രയ്ക്ക് കേന്ദ്ര ആഭ്യന്തരമന്ത്രാലയത്തിൻറെ അനുമതി തേടി.
കേസിൽ ഏതു തരത്തിലാണ് നയതന്ത്ര സംവിധാനം ദുരുപയോഗം ചെയ്തതെന്നാണ് സംഘം അന്വേഷിക്കുന്നത്. യുഎഇ സർക്കാരിൻറെ നിലപാട് ഇക്കാര്യത്തിൽ നിർണായകമാകും. കൂടാതെ ദുബയി പോലീസിന്റെ കസ്റ്റഡിയിലുള്ള ഫൈസൽ ഫരീദിനെ തിരിച്ചു കൊണ്ടു വരുന്നതിനുള്ള നടപടികളും സ്വീകരിക്കും.
അതേസമയം, സ്വർണക്കടത്ത് കേസ് അന്വേഷണ വിവരങ്ങൾ അടങ്ങിയ ഡയറി ഇന്ന് കോടതിയിൽ സമർപ്പിക്കും. കെ.ടി. റമീസിൻറെ കസ്റ്റഡി നീട്ടാനും അപേക്ഷിക്കും. സ്വപ്ന സുരേഷിൻറെ ജാമ്യാപേക്ഷയും ഇന്ന് എൻഐഎ കോടതി പരിഗണിക്കും.
