സംസ്ഥാനത്തെ വിനോദ സഞ്ചാര കേന്ദ്രങ്ങൾ തുറന്നു.. ശ്രദ്ധിക്കണം ഇക്കാര്യങ്ങൾ.! ഹില്സ്റ്റേഷനുകളും സാഹസിക വിനോദസഞ്ചാര കേന്ദ്രങ്ങളും കായലോര ടൂറിസം കേന്ദ്രങ്ങളുമാണ് ഇന്നുമുതൽ തുറന്നു കൊടുക്കുന്നത്. എന്നാൽ ബീച്ചുകൾ അടുത്ത മാസം ഒന്ന് മുതലാവും തുറക്കുക. കൊവിഡ് സാഹചര്യത്തിൽ സന്ദർശനത്തിനെത്തുന്ന വിനോദ സഞ്ചാരികൾ ശ്രദ്ധേക്കേണ്ട കാര്യങ്ങളും സർക്കാർ വ്യക്തമാക്കുന്നുണ്ട്.
കോവിഡ് വ്യാപനം മൂലം നിശ്ചലമായ ടൂറിസം മേഖലയും സജീവമാകുന്നു. രണ്ട് ഘട്ടങ്ങളിലായി സംസ്ഥാനത്തെ വിനോദ സഞ്ചാര കേന്ദ്രങ്ങൾ സഞ്ചാരികൾക്ക് തുറന്നു നൽകാൻ തീരുമാനമായി. ഹില്സ്റ്റേഷനുകളും സാഹസിക വിനോദസഞ്ചാര കേന്ദ്രങ്ങളും കായലോര ടൂറിസം കേന്ദ്രങ്ങളും തുറക്കുന്നതിനാണ് ഉത്തരവ്. കോവിഡ് പ്രോട്ടോക്കോള് നിര്ബന്ധമായും പാലിച്ചായിരിക്കും ഇത്തരം കേന്ദ്രങ്ങളുടെ പ്രവർത്തനം.
മറ്റ് സംസ്ഥാനങ്ങളില് നിന്ന് ബിസിനസ് ആവശ്യങ്ങള്ക്ക് 7 ദിവസം വരെ കേരളത്തില് വന്ന് മടങ്ങുന്നവര്ക്ക് ക്വാറന്റീന് നിര്ബന്ധമല്ലെന്ന് നേരത്തെ ഉത്തരവിറക്കിയിരുന്നു. ഇതേ മാതൃകയില് മറ്റ് സംസ്ഥാനങ്ങളില് നിന്നുള്ള ടൂറിസ്റ്റുകള്ക്കും ഒരാഴ്ച്ച വരെയുള്ള ഹ്രസ്വസന്ദര്ശനത്തിന് ക്വാറന്റീന് നിര്ബന്ധമില്ല. സംസ്ഥാനത്തിന് പുറത്ത് നിന്നുമെത്തുന്ന സഞ്ചാരികള് കൊവിഡ് ജാഗ്രതാ പോര്ട്ടലില് രജിസ്റ്റര് ചെയ്യണം.
7 ദിവസം കഴിഞ്ഞും മടങ്ങുന്നില്ലെങ്കില്, ടൂറിസ്റ്റുകള് സ്വന്തം ചെലവില് കൊവിഡ് പരിശോധനയ്ക്ക് വിധേയമാകേണ്ടതാണ്. 7 ദിവസത്തില് കൂടുതല് ചെലവഴിക്കാന് ആഗ്രഹിക്കുന്നവര് കൊവിഡ് നെഗറ്റീവ് സര്ട്ടിഫിക്കേറ്റുമായി എത്തുകയോ, കേരളത്തില് എത്തിയാല് ഉടന് കോവിഡ് പരിശോധന നടത്തുകയോ ചെയ്യണം. അതല്ലെങ്കില് ആ സഞ്ചാരികള് 7 ദിവസം ക്വാറന്റൈനില് പോകേണ്ടിവരും.
കോവിഡ് രോഗലക്ഷണങ്ങള് എന്തെങ്കിലുമുണ്ടെങ്കില് ടൂറിസ്റ്റുകള് യാത്ര ചെയ്യാന് പാടില്ല.
മാസ്ക് നിര്ബന്ധമായും ധരിക്കുകയും, സാനിട്ടൈസര് ഉപയോഗിക്കുകയും, രണ്ട് മീറ്റര് സാമൂഹിക അകലം മറ്റുള്ളവരില് നിന്നും പാലിക്കുകയും വേണം.
വിനോദസഞ്ചാരികള്ക്ക് സന്ദര്ശന വേളയില് കൊവിഡ് രോഗബാധ ലക്ഷണങ്ങള് ഉണ്ടായാല് ദിശ യില് ബന്ധപ്പെട്ട് ആരോഗ്യപ്രവര്ത്തകരുടെ സേവനം തേടേണ്ടതാണ്. രോഗലക്ഷണങ്ങള് ഉള്ളവര് ഐസോലേഷനില് പോകേണ്ടതുമാണ്.
