കടയ്ക്കൽ ചന്ദ്രൻ നിയമസഭാ തെരഞ്ഞെടുപ്പിന് മുൻപെത്തും. ആരാധകര് ഏറെ പ്രതീക്ഷയോടെ കാത്തിരിക്കുന്ന ചിത്രമാണ് മമ്മൂട്ടിയുടെ വണ്. മുഖ്യമന്ത്രി കടക്കല് ചന്ദ്രനായായി മമ്മൂട്ടിയെത്തുന്ന ‘വണ്’ ചിത്രം നിയമസഭാ തെരഞ്ഞെടുപ്പിന് മുന്പ് തീയേറ്ററുകളിലെത്തുമെന്ന് സംവിധായകന് സന്തോഷ് വിശ്വനാഥ്. ഏപ്രില് അവസാനത്തോടെ ചിത്രം റിലീസാകുമെന്ന് സന്തോഷ് വിശ്വനാഥ് പറഞ്ഞു.ക്ലൈമാക്സില് മമ്മൂട്ടിയുടെ ഭാഗം ഇനിയും ചിത്രീകരിക്കാന് ബാക്കിയുണ്ട്.
കോവിഡ് പ്രതിസന്ധിമൂലം ഷൂട്ട് നീണ്ടുപോയിരുന്നു. ഇതുമായി ബന്ധപ്പെട്ട് മമ്മൂട്ടിയോട് സംസാരിച്ചെന്നും ഈ മാസം അവസാനത്തോടെ തന്നെ വണിന്റെ ചിത്രീകരണം പൂര്ത്തിയാക്കുമെന്നും സംവിധായകന് വ്യക്തമാക്കി. മമ്മൂട്ടിയുടെ ഇപ്പോഴത്തെ ലുക്ക് സിനിമ കടക്കല് ചന്ദ്രന്റെ ലുക്കിനെ ബാധിക്കില്ലേ എന്ന ചോദ്യത്തിന് അത്തരത്തില് ബാധിക്കാത്ത വിധത്തിലാണ് ചിത്രീകരണം ആസൂത്രണം ചെയ്തിരിക്കുന്നതെന്ന് സംവിധായകന് പറഞ്ഞു.മമ്മൂട്ടി അമല് നീരദ് ചിത്രത്തിന്റെ ഭാഗമാകും മുന്പ് ചിത്രീകരണം പൂര്ത്തിയാക്കും. ബോബിയും സഞ്ജയും ചേര്ന്നാണ് വണിന് തിരക്കഥ രചിച്ചിരിക്കുന്നത് . നിമിഷ സജയന്, ജോജു ജോര്ജ്, മുരളി ഗോപി, സിദ്ദിഖ്, സുദേവ് നായര് തുടങ്ങിയവരും ചിത്രത്തില് പ്രധാന വേഷത്തിലെത്തുന്നു. ‘കടക്കല് ചന്ദ്രന്’ മുഖ്യമന്ത്രിയായി ഉടന് സത്യപ്രതിജ്ഞ ചെയ്യും എന്നെഴുതിയ പോസ്റ്റര് മുന്പ് അണിയറപ്രവർത്തകർ പുറത്തുവിട്ടിരുന്നു.
