പ്രതീകാത്മക ചിത്രം
ജനുവരി 1 മുതൽ കേരളത്തിലെ സർക്കാർ ഓഫീസുകളിൽ പണമിടപാടുകൾക്കായി യു.പി.ഐ, ക്യു.ആർ കോഡ് സംവിധാനം ഏർപ്പെടുത്തുമെന്ന് റിപ്പോർട്ട്. ഭൂനികുതി, ട്രാഫിക് ലംഘനങ്ങൾക്കുള്ള പിഴ തുടങ്ങിയ എല്ലാ സർക്കാർ പണമിടപാടുകളും യു.പി.ഐ വഴി നടത്താം. സർക്കാർ ഓഫീസുകളെ കൂടുതൽ ഡിജിറ്റൽവത്കരിക്കാനുള്ള ശ്രമങ്ങളുടെ ഭാഗമായാണ് പദ്ധതി.
സർക്കാർ ഓഫീസുകളിൽ പണം സ്വീകരിക്കുന്നത് തുടരുമെങ്കിലും ഫിസിക്കൽ രസീത് ലഭിക്കുകയില്ല. നിലവിൽ എല്ലാ പണമിടപാടുകൾക്കും രസീത് നൽകുന്നുണ്ട്. ജനുവരി 1 മുതൽ നേരിട്ടോ ഡിജിറ്റൽ രീതിയിലോ പണമടയ്ക്കുന്നവർക്ക് എസ്.എം.എസ് വഴിയാകും രസീത് ലഭിക്കുക.
ഓൺലൈൻ ചലാൻ പേയ്മെന്റുകൾക്കുള്ള ചലാൻ നമ്പർ ഉപഭോക്താവിന്റെ ഫോണിലേക്ക് മെസേജ് ആയി ലഭിക്കും.
മൂന്ന് മാസം മുൻപ് എല്ലാ സർക്കാർ ഓഫീസുകളിൽ പരീക്ഷണാടിസ്ഥാനത്തിൽ ഡിജിറ്റൽ പേയ്മെന്റ് സംവിധാനം ആരംഭിച്ചെങ്കിലും പലരും അത് പിന്തുടർന്നിരുന്നില്ല. ഇതോടെയാണ് ജനുവരി 1 മുതൽ പദ്ധതി കൂടുതൽ വ്യാപിപ്പിക്കാൻ ധനകാര്യവകുപ്പ് തീരുമാനിച്ചത്.
