മലയാള സിനിമയിലെ ആദ്യ നായികയാരുന്നു പി.കെ റോസിക്ക് ആദരവുമായി ഗൂഗിള്. തന്റെ ആദ്യ സിനിമ പ്രദര്ശിപ്പിക്കപ്പെടുമ്പോള് സവര്ണ മേധാവികളെ ഭയന്ന് അപമാനിതയായി നാടുവിട്ട് പോകേണ്ടി വന്നു അവര്ക്ക്.
ഫെബ്രുവരി 10 പി.കെ റോസിയുടെ ജൻമദിനമാണ്.1903 ഫെബ്രുവരി 10നാണ് അവര് ജനിച്ചത്.
ഗൂഗിള് തങ്ങളുടെ ഹോം പേജില് ഡൂഡില് ഒരുക്കിയാണ് റോസിക്ക് ആദരവ് അര്പ്പിച്ചിരിക്കുന്നത്. പ്രത്യേക ദിവസങ്ങളില് വ്യക്തികളെയോ, സംഭവങ്ങളെയോ ഓര്ക്കാന് ഗൂഗിള് തങ്ങളുടെ ലോഗോയ്ക്കൊപ്പം ഒരുക്കുന്ന പ്രത്യേക ആര്ട്ടിനെയാണ് ഡൂഡില് എന്ന് പറയുന്നത്.
പി.കെ റോസിയുടെ ഛായ ചിത്രമാണ് ഗൂഗിള് ഇന്ന് ഹോം പേജില് പ്രദര്ശിപ്പിച്ചിരിക്കുന്നത്. ഇതില് ക്ലിക്ക് ചെയ്താല് പികെ റോസിയുടെ വിവരങ്ങളിലേക്ക് പോകാന് സാധിക്കും. ജെ.സി ഡാനിയല് സംവിധാനം ചെയ്ത മലയാളത്തിലെ ആദ്യ സിനിമയായ വിഗതകുമാരനിലാണ് റോസി നായികയായി അഭിനയിച്ചത്. ഇതിന്റെ പേരില് റോസിക്ക് വലിയ അക്രമണങ്ങള് തന്നെ നേരിടേണ്ടി വന്നു.
ജാതി ശക്തമായി നിലനിന്നിരുന്ന അക്കാലത്ത് സവര്ണ മേലാളന്മാര് റോസിയുടെ വീട് ആക്രമിക്കുകയും തന്റെ ആദ്യ സിനിമ തിയേറ്ററില് കാണാനെത്തിയ റോസിയെ കയ്യേറ്റം ചെയ്യുകയും ചെയ്തു. സിനിമയില് റോസി സവര്ണ സ്ത്രീയുടെ വേഷത്തിലെത്തിയതായിരുന്നു ജാതി ഭ്രാന്തന്മാരെ ചൊടിപ്പിച്ചതിന്റെ പ്രധാന കാരണം.
കമൽ സംവിധാനം ചെയ്ത് 2013ൽ റിലീസ് ചെയ്ത സെല്ലുലോയ്ഡ് എന്ന ചിത്രം റോസിയുടെ കഥയാണ് പറഞ്ഞത്.
