ന്യൂഡല്ഹി: ചൈന-ഇന്ത്യ സൈനികര് തമ്മില് ഏറ്റുമുട്ടലുണ്ടായ സാഹചര്യത്തില് പ്രധാനമന്ത്രി നരേന്ദ്ര മോദി സര്വ്വകക്ഷിയോഗം വിളിച്ചു. വെള്ളിയാഴ്ച വൈകീട്ട് അഞ്ചു മണിക്കാണ് യോഗം. പ്രധാനമന്ത്രിയുടെ ഓഫീസാണ് ഇക്കാര്യം അറിയിച്ചത്. വിവിധ രാഷ്ട്രീയ പാര്ട്ടികളുടെ അധ്യക്ഷന്മാരും യോഗത്തില് പങ്കെടുക്കും.
തിങ്കളാഴ്ച രാത്രി ഗല്വാന് താഴ്വരയില് ചൈനീസ് സൈന്യവുമായുണ്ടായ ഏറ്റുമുട്ടലില് കേണലടക്കം 20 ഇന്ത്യന് സൈനികര് വീരമൃത്യുവരിച്ചിരുന്നു. സംഭവത്തില് പ്രധാമന്ത്രി നരേന്ദ്ര മോദി പ്രതികരിക്കാത്തതില് കോണ്ഗ്രസ് അടക്കമുള്ള പ്രതിപക്ഷ പാര്ട്ടികള് വിമര്ശനമുന്നയിക്കുന്നതിനിടെയാണ് സര്വ്വകക്ഷിയോഗം വിളിച്ചിരിക്കുന്നത്. സര്വ്വകക്ഷി യോഗം വിളിക്കണമെന്ന് കോണ്ഗ്രസ് ആവശ്യപ്പെടുകയും ചെയ്തിരുന്നു.
