തിരുവനന്തപുരം: സര്ക്കാര് ഓഫീസുകളില് ഒരു സമയം പകുതി ജീവനക്കാര് മാത്രം മതിയെന്ന് മുഖ്യമന്ത്രി പിണറായി വിജയന്. കോവിഡ് വര്ധന ഉണ്ടാകുന്ന സാഹചര്യത്തില് സര്ക്കാര് ഓഫീസുകള് നിലച്ച് പോകാതെ ഇരിക്കാനാണ് ഇത്തരത്തില് ഒരു തീരുമാനം എടുത്തതെന്നും അദ്ദേഹം പറഞ്ഞു.
പകുതി ആളുകള് ഒരാഴ്ച ഓഫീസിലിരുന്നും ശേഷിക്കുന്നവര് വീടുകളിലിരുന്ന് ജോലി ചെയ്യണം. അടുത്ത ആഴ്ച മറ്റുള്ളവര് ഓഫീസില് എത്തണം. ഈ സമയത്ത് രോഗം ബാധച്ചാല് പോലും ഒരു വിഭാഗത്തെ മാത്രമേ ക്വാറന്റീനിലാക്കേണ്ടതുള്ളു എന്നും മുഖ്യമന്ത്രി ചൂണ്ടിക്കാണിച്ചു. കൂടാതെ ഓഫീസ് മീറ്റിങ്ങുകള് ഓണ്ലൈനിലാക്കണമെന്നും മുഖ്യമന്ത്രി പറഞ്ഞു.
ഓഫീസ് പ്രവര്ത്തനങ്ങളുടെ നടപടിക്രമം ചീഫ് സെക്രട്ടറി തന്നെ പരിശോധിച്ച് ഉറപ്പ് വരുത്തും. കോവിഡ് ഡ്യൂട്ടിക്ക് നിയോഗിക്കുമ്പോള് അതാത് ജില്ലകളില് നിന്നുള്ളവരെ പൂള് ചെയ്ത് ഉപയോഗിക്കുന്നതാണ് നല്ലത്. കോവിഡ് ഡ്യൂട്ടി ചെയ്യുന്നവര് കുടുംബത്തോടൊപ്പം ആ ഘട്ടത്തില് താമസിക്കരുന്നും മുഖ്യമന്ത്രി കൂട്ടിച്ചേര്ത്തു.
സര്ക്കാര് ഓഫീസുകളിലേയ്ക്ക് ദൂരസ്ഥലങ്ങളില് നിന്ന് കൂട്ടായി സഞ്ചരിക്കുന്നവരെ തടയരുതെന്നും മുഖ്യമന്ത്രി പറഞ്ഞു. ദൂരസ്ഥലങ്ങളില് നിന്ന് യാത്ര ചെയ്യേണ്ടി വരുമ്പോള് പലരും കൂട്ടായി വാഹനം വാടകയ്ക്ക് എടുക്കാറുണ്ടെന്നും ഇത്തരത്തില് യാത്ര ചെയ്യുന്നവരെ തടയാനോ വിഷമങ്ങളുണ്ടാക്കാനോ പോലീസോ മോട്ടോര് വാഹന വകുപ്പ് ഉദ്യോഗസ്ഥരോ തയ്യാറാകരുതെന്നും മുഖ്യമന്ത്രി നിര്ദേശിച്ചു.
