കോട്ടയം: ജില്ലയിൽ സമ്പർക്ക രോഗികളുടെ എണ്ണം കുതിച്ചുയരുന്നു. 62 പേർക്കു കൂടി കോവിഡ് സ്ഥിരീകരിച്ചതിൽ 61 പേർക്കും സമ്പർക്കത്തിലൂടെയാണ് രോഗം ബാധിച്ചത്. ഇന്ന് ആകെ 1,231 പരിശോധനാ ഫലങ്ങളാണ് പുതിയതായി ലഭിച്ചത്. ഇതിൽ സംസ്ഥാനത്തിന് പുറത്തുനിന്ന് വന്ന ഒരാളും രോഗബാധിതനായി.
പുതിയ രോഗികളിൽ 28 പേർ കോട്ടയം മുനിസിപ്പാലിറ്റിയിൽനിന്നുള്ളവരാണ്. കൂരോപ്പട, പാമ്പാടി-ആറ് വീതം, കുറിച്ചി-നാല്, ചങ്ങനാശേരി-മൂന്ന് എന്നിവയാണ് സമ്പർക്കം മുഖേന രോഗം ബാധിച്ചവർ കൂടുതലുള്ള മറ്റു സ്ഥലങ്ങൾ. അതേസമയം, രോഗം ഭേദമായ 115 പേർ കൂടി ആശുപത്രി വിട്ടു.
നിലവിൽ 1,422 പേരാണ് ചികിത്സയിലുള്ളത്. ഇതുവരെ 4,054 പേർ രോഗബാധിതരായി. 2,629 പേർ രോഗമുക്തി നേടി. ജില്ലയിൽ ആകെ 15,603 പേർ ക്വാറൻറൈനിൽ കഴിയുന്നുണ്ട്.
