സർക്കാരുമായി നടത്തിയ ചർച്ച പരാജയം ; സമരം തുടരും - BMTV

തിരുവനന്തപുരം: സെക്രട്ടേറിയറ്റിനു മുന്നിലെ പിഎസ് സി റാങ്ക് ജേതാക്കളുടെ സമരം അവസാനിപ്പിക്കുന്നതിനായി ഡി വൈഎഫ്.ഐ മുന്‍കയ്യെടുത്ത് മുഖ്യമന്ത്രിയുടെ ഓഫിസുമായി നടത്തിയ രാത്രി ചർച്ച പരാജയപ്പെട്ടു. അതേസമയം ബാഹ്യ ഇടപെടലാണ് ചർച്ച പരാജയപ്പെടാൻ കാരണമെന്ന് മധ്യസ്ഥത വഹിച്ച ഡിവൈഎഫ്ഐ നേതൃത്വം ആരോപിച്ചു. പിഎസ്‌സി റാങ്ക് ലിസ്റ്റിൽ ഉൾപ്പെട്ടവർക്കു മതിയായ നിയമനം നൽകാത്തതിൽ പ്രതിഷേധിച്ച് ലാസ്റ്റ് ഗ്രേഡ് റാങ്ക് ലിസ്റ്റ് അസോസിയേഷൻ സെക്രട്ടേറിയറ്റിനു മുന്നിൽ നടത്തുന്ന സമരം 18-ാം ദിവസവും ശക്തമായി തുടരും.

സമരത്തെയും സമര നേതൃത്വത്തേയും തള്ളിപ്പറഞ്ഞ സർക്കാർ രാത്രി പതിനൊന്ന് മണിക്ക് ലാസ്റ്റ് ഗ്രേഡ് ഉദ്യോഗാർഥികളുമായി ചർച്ചയ്ക്ക് തയാറായതോടെ സമാവായത്തിലെത്തുമെന്നായിരുന്നു പ്രതീക്ഷ. ഇന്നലെ രാത്രി അസോസിയേഷൻ പ്രതിനിധികളുമായി ഡിവൈഎഫ്ഐ സംസ്ഥാന പ്രസിഡന്റ് എസ്.സതീഷും സെക്രട്ടറി എ.എ.റഹിമും കൂടിക്കാഴ്ച നടത്തിയിരുന്നു തുടർന്നായിരുന്നു മുഖ്യമന്ത്രിയുടെ ഓഫിസുമായി ചർച്ച നടന്നത്. രണ്ടര മണിക്കൂർ നീണ്ടുനിന്ന ചർച്ചയ്ക്ക് ശേഷം പുറത്തിറങ്ങിയ ഉദ്യോഗാർഥികൾ തസ്തിക സൃഷ്ടിക്കുന്നത് ഉൾപ്പെടെയുള്ള കാര്യങ്ങളിൽ സർക്കാരിൽ നിന്ന് ഉറപ്പ് കിട്ടിയില്ലെന്ന് വ്യക്തമാക്കി. ചർച്ചയിൽ തീരുമാനമാകാത്തതിനാൽ സമരം തുടരും.എന്നാൽ ഉദ്യോഗാർഥികൾ ഉന്നയിച്ച ചില കാര്യങ്ങൾ അപ്രായോഗികമായിരുന്നുവെന്ന് ചർച്ചയ്ക്ക് മധ്യസ്ഥത വഹിച്ച ഡിവൈഎഫ്ഐ നേതൃത്വം പറഞ്ഞു.