ജില്ലയിലുടനീളം മയക്കുമരുന്നിനെതിരെ "മോചന ജ്വാല" യുമായി കേരളാ കോണ്‍ഗ്രസ് (എം)

കോട്ടയം: വര്‍ദ്ധിച്ചുവരുന്ന മയക്കുമരുന്ന് ഉപയോഗത്തിനെതിരെ സമൂഹ മന:സാക്ഷിയെ ഉണര്‍ത്തുക എന്ന ലക്ഷ്യത്തോടെ കേരളാ കോണ്‍ഗ്രസ് (എം) ന്റെ നേതൃത്വത്തില്‍ കോട്ടയം ജില്ലയിലാകെ ബോധവല്‍ക്കരണ പരിപാടിക്ക് തുടക്കം കുറിക്കുന്നു. 

മയക്കുമരുന്നിനെതിരെ മോചനജ്വാലയുമായി ശിശുദിനമായ നവംബര്‍ 14 ന് ജില്ലയിലെ മുഴുവന്‍ വാര്‍ഡ് കമ്മറ്റികളുടെയും മണ്ഡലം കമ്മിറ്റികളുടെയും നേതൃത്വത്തില്‍ വാര്‍ഡിലെ തെരഞ്ഞെടുത്ത കേന്ദ്രങ്ങളില്‍ പ്രവര്‍ത്തകര്‍ അണിനിരക്കുന്നു. 

വൈകുന്നേരം 5 നും 7നും ഇടയിലാണ് പരിപാടി സംഘടിപ്പിക്കുന്നത്. ജില്ലയിലൊട്ടാകെ 500 കേന്ദ്രങ്ങളിൽ മോചന ജ്വാല തെളിക്കും. ഇതോടൊപ്പം മയക്കുമരുന്നിനെതിരെ സത്യപ്രതിജ്ജയും എടുക്കും. 

ഇതിന് മുന്നോടിയായി ഓരോ വാർഡിലെയും ഭവനങ്ങളും വ്യാപാരസ്ഥാപനങ്ങളും പൊതുസ്ഥലങ്ങളും സന്ദര്‍ശിച്ച് മയക്കുമരുന്ന് വിരുദ്ധ പ്രചരണം നടത്തുകയും ലഘുലേഖ നൽകുകയും ചെയ്തു വരുന്നു. വിവിധ കേന്ദ്രങ്ങളില്‍ നിന്ന് മണ്ഡലത്തിലെ പ്രധാന ജംഗ്ഷനിലേക്ക് ജാഥയും സംഘടിപ്പിക്കും.

മയക്കുമരുന്ന്‌ വിരുദ്ധ സന്ദേശം വിളിച്ചോതുന്ന ദൃശ്യങ്ങളും പ്ലക്കാര്‍ഡുകളും ജാഥക്ക് കൊഴുപ്പേകും. മത, സാമുദായിക, സാംസ്‌ക്കാരിക നേതാക്കളടക്കം സമൂഹത്തിന്റെ വിവിധ തുറകളിലുള്ളവര്‍ മോചനജ്വാലയില്‍ വിവിധ കേന്ദ്രങ്ങളിൽ പങ്കാളികളാകും. 

ലഹരിമരുന്നിനെതിരായ രണ്ടാം ഘട്ട പ്രചരണ പരിപാടികള്‍ക്ക് സംസ്ഥാന സര്‍ക്കാര്‍ തുടക്കം കുറിക്കുന്നതും ശിശുദിനമായ നവംബര്‍ 14നാണ്.  മയക്ക് മരുന്നിനെതിരെയുള്ള പോരാട്ടത്തില്‍ ഒരു രാഷ്ട്രീയ പ്രസ്ഥാനം ഇത്ര വിപുലമായ രീതിയില്‍ ഭവന സന്ദര്‍ശനവും മറ്റ് പ്രചരണ പരിപാടികളും സംഘടിപ്പിക്കുന്നത് ആദ്യമായിട്ടാണ്.

ജില്ലാതല പരിപാടികളുടെ ഉദ്ഘാടനം നവംബർ 14 തിങ്കൾ വൈകിട്ട് 6 മണിക്ക് പാലാ ളാലം ജംഗ്ഷനിൽ കേരള കോൺഗ്രസ് (എം) ചെയർമാൻ ജോസ് കെ മാണി എംപി ഉദ്ഘാടനം ചെയ്യും. ജില്ലാ പ്രസിഡന്റ് ലോപ്പസ് മാത്യു അധ്യക്ഷത വഹിക്കും.