പാലാ നഗരസഭയുടെ ഒരു വർഷം നീണ്ട് നിൽക്കുന്ന പ്ലാറ്റിനം ജൂബിലി ആഘോഷങ്ങൾക്ക് ഈ മാസം 21 ന് തുടക്കമാകും. ആഘോഷ പരിപാടികളുടെ ഉദ്ഘാടനം 22 ന് സഹകരണ വകുപ്പ് മന്ത്രി വിഎൻ വാസവൻ നിർവഹിക്കും.
1947 ഓഗസ്റ്റ് 28 ന് രൂപീകൃതമായ പാലാ നഗരസഭയുടെ 75 -ാം വാർഷികം വിപുലമായ പരിപാടികളോടെ ആഘോഷിക്കും. ഇതോടനനുബന്ധിച്ച് നഗരസഭാ കോൺഫ്രൻസ് ഹാളിൽ സ്വാഗതസംഘം യോഗം ചേർന്നു. സ്വാഗത സംഘത്തിൽ ആൻ്റോ ജോസ് പടിഞ്ഞാറെക്കരയെ കൺവീനറായും സിജി പ്രസാദിനെ ജോയിൻ്റ് കൺവീനറായും പ്രഫ. സതീഷ്ചൊള്ളാനി, ബിനു പുളിക്കകണ്ടം എന്നിവരെ വൈസ് ചെയർമാൻമാരായും ബിജു പാലുപ്പടവനെ കോ-ഓർഡിനേറ്ററായും തെരഞ്ഞെടുത്തു.
പരിപാടികളുടെ വിജയത്തിനായി കൗൺസിലർമാർ ,മുനിസിപ്പൽ ജീവനക്കാർ, സ്കൂൾ, കോളേജ് പ്രതിനിധികൾ, വ്യാപാരി വ്യവസായി പ്രതിനിധികൾ രാഷ്ട്രിയ സാമൂഹ്യ സംസ്കാരിക പ്രതിനിധികൾ എന്നിവർ ഉൾപ്പെട്ട 101 അംഗ കമ്മറ്റിയും രൂപികരിച്ചു.
മുൻസിപ്പൽ ചെയർമാൻ ആന്റോ ജോസ് പടിഞ്ഞാറേക്കരയുടെ അധ്യക്ഷതയിൽ ചേർന്ന യോഗത്തിൽ കൗൺസിലർമാരും, സാമൂഹ്യ സാംസ്കാരിക രംഗങ്ങളിലെ പ്രമുഖരും പങ്കെടുത്തു. ഈ മാസം 21 ന് പരിപാടികൾക്ക് തുടക്കമാകും.
21 ന് പരിപാടിയുടെ ഭാഗമായി മുൻസിപ്പൽ ടൗൺ ഹാളിൽ പാലായുടെ ചരിത്രം പറയുന്ന സെമിനാർ നടക്കും. 22 ന് സാംസ്കാരിക റാലി, പൊതു സമ്മേളനം എന്നിവ നടക്കും. പ്ലാറ്റിനം ജൂബിലി ആഘോഷങ്ങളുടെ ഭാഗമായി വോളിബോൾ ടൂർണമെന്റ്, വിവിധ രംഗങ്ങളിലെ പ്രമുഖരെ ആദരിക്കൽ, ടാബ്ലോ, മറ്റ് കലാപരിപാടികൾ , വൈദ്യുത ദീപാലങ്കാരങ്ങൾ , ചിത്ര പ്രദർശനം എന്നിവയും ഉണ്ടാകും. ചടങ്ങിൽ രാഷ്ട്രീയ സാമൂഹ്യ സാംസ്കാരിക രംഗങ്ങളിലെ പ്രമുഖർ പങ്കെടുക്കും.
